HiRISE tekur oft myndir af lendingarförum á yfirborði Mars af ýmsum ástæðum, svo sem til að kanna staðsetningu jeppa, heilsu lendingarfara sem eru ekki lengur starfandi eða aðstæður í nágrenninu eftir stóra veðuratburði.

Þessi mynd var tekin 9. mars 2022 og sýnir hversu rykugt InSight lendingarfarið er orðið eftir lendingu í nóvember 2018, sér í lagi eftir rykstorm í janúar 2022. Dökku bremsuförin við hlið geimfarsins, sem urðu til við lendinguna, eru líka smám saman að hverfa. Að sama skapi er fallhlífin mun rykugri nú en eftir lendingu.

Langtíma vöktun á stöðum sem þessum segir okkur hvernig ryk þyrlast upp og dreifist um Mars og hjápar okkur líka að skilja hvernig yfirborðið þróast með tímanum.

Þýðing: Sævar Helgi Bragason